အလဵုသဳဂျပါန် ကေုာံ နိပေါန်ဖှံၚ်ဒေရှေန် ကဵုထံက်ပၚ် ပရေၚ်ဖေါအ်ဗြေဝ် အပ္ဍဲဒေသဂကောံထပက်စၟတ်တဲ ပရေၚ်ၜိုဟ်လလံတုဲ ၜါဂကောံရောၚ် နူကဵုညးတာလျိုၚ်ဗော်ဍုၚ်မန်တၟိသ္ဂးလဝ်ရ။
သွက်ဂွံထံက်ပၚ်ပရေၚ်ဖေါအ်ဗြေဝ် အပ္ဍဲဒေသဗော်ဍုၚ်မန်တၟိ ကေုာံ အပ္ဍဲဒေသကေအေဲန်ယူ ပအုပ်ဓုပ်လဝ်တံ (၃၀) ပြကောဋိကိုတ်ဒဝ်ဠာရောၚ် နိပေါန်ဖှံၚ်ဒေရှေန် ကဵုလဝ်ဂတိပါၚ်ရ။ ပရေၚ်ထံက်ပၚ်ဏံဝွံ သွက်ဂွံသိုၚ်ခၞံသ္ၚိ၊ ဘာဗ္တောန်လိက်၊ ဌာနရုၚ်ဂဥုဲ၊ ဇြဟတ်ဓါတ်ပၟတ်သဝ်ဠာ ပါကီုရောၚ် နူကဵုဌာနအလဵုသဳ တွဵုရးဍုၚ်မန် ဒါရိုက်တာ မြေတ်တာန်ဝေန် သ္ဂးလဝ်ရ။
ပ္ဍဲကဵုအစဳဇန်ထံက်ပၚ်ပရေၚ်ဖေါအ်ဗြေဝ်ဏံဝွံ သွက်ဂွံသိုၚ်ခၞံ သ္ၚိ (၃၃၀) မ မၞုံအပ္ဍဲကဵု (၇) ကွာန် ပ္ဍဲကဵုပွိုၚ်ဍုၚ်ရေဝ်ကီု သွက်ဂွံသိုၚ်ပတန် ဌာနရုၚ်ဂဥုဲ အပ္ဍဲကဵု(၂) ကွာန်ကီု ဘာကောန်ဂကူမန်(၆)ဘာကီု ကေုာံ သွက်ဂွံဖျေံကဵု ဇြဟတ်ဓါတ်ပၟတ်သဝ်ဠာလၟိဟ်(၂၃၁၂)ဂတေဟ် အပ္ဍဲကဵု (၂၀)ကွာန်ကီု ဂွံလဝ်တၚ်တုပ်စိုတ် အကြာဗော်ဍုၚ်မန်တၟိကဵု နိပေါန်ဖှံၚ်ဒေရှေန် ညးတာလျိုၚ်ဌာနအလဵုသဳတံသ္ဂးလဝ်ရ။ စက်တုက်တိ (၃) ပိဖ္ဍိုက် အပ်ပြာပ်လဝ်တုဲရ။
တၚ်တုပ်စိုတ်ပ္ဍဲကဵု (၃) ပါတဳဏံဝွံ ပ္ညဳပ္ညပ်သဳကၠဳဖျေံလဝ်ဗီုပြၚ် ပ္ဍဲကဵုရုၚ်အလဵုသဳတွဵုရးဍုၚ်မန် ပ္ဍဲကဵုတ္ၚဲဗုဒ္ဓဝါ (၀၇၊၃၁၊၂၀၁၉) တုဲ ကၠုၚ်တေံဗွဲမအံၚ်ဇၞးရောၚ် မြေတ်တာန်ဝေန် ဟီုလဝ်ကဵု ဌာနပရိုၚ်တံ (NMG)ရ၊
သ္ၚိကီု ဘာဗ္တောန်လိက်ကီု ဌာနရုၚ်ဂဥုဲကီု သိုၚ်ပတန်အာအကြာပွဳပွိုၚ်အုပ်ဓုပ် ကောန်ဂကောံဗော်ဍုၚ်မန်တၟိတံရောၚ် ညးတာလျိုၚ်ဗဟဵုကမ္မတီ ဗော်ဍုၚ်မန်တၟိ နာဲဟံသာဟီုလဝ်ရ။
ပိုဲထပက်လဝ်စၟတ်တဲ ဒေါံပန်ပှော်အလုံကၟိန်ဍုၚ်( NCA)ဂှ် သွက်ဂွံကၠောန်ပရေၚ်ဖေါအ်ဗြေဝ်ဒေသပိုဲရောၚ် တိုန်ထ္ၜးလဝ်ရ။
သွက်ဂွံကၠောန်အာ ပရေၚ်ဖေါအ်ဗြေဝ်လၟေၚ်ၚ် မပတိုန်ထ္ၜးလဝ် ပ္ဍဲအလဵုသဳတွဵုရးဂှ် ဂကောံနိပေါန်ဖှံၚ်ဒေရှေန်
ကေုာံ ဗော်ဍုၚ်မန်တၟိတံ ဂွံလဝ်တၚ်တုပ်စိုတ်ရောၚ်၊ နာဲဟံသာဟီုလဝ်ကဵု ဌာနပရိုၚ်တံ (NMG)ရ၊
ပရဵုဂျေတ်ပရေၚ်ဖေါအ်ဗြေဝ် အပ္ဍဲအကြာပွဳပွိုၚ်အုပ်ဓုပ်ဗော်ဍုၚ်မန်တၟိဝွံ ဂိတုအံက်ဒေါပါဏံ စချဳဓရာၚ်တုဲ စိုပ်ဂိတုဨပြဳအာစပ်ဒတုဲရောၚ်
ညးတာလျိုၚ်တံစၟဳရန်လဝ်အိုတ်ရ။
စက်တုက်တိ ကေုာံ စက်တၞဟ်ဟ်တံဂမၠိုၚ် မကဵုလဝ်ထံပၚ် နူကဵုဂကောံနိပေါန်ဖှံဒေရှေန် ပ္ဍဲဂိတုဨပြဳတုဲကၠုၚ်တေံ သၞာံဏံဂှ်
ကၠောန်ဗဒှ်အသေဟာန်သဘၚ်အပ်ပြာပ် ပ္ဍဲကဵုကွာန်ပုပ္ဖဝတဳ ဘာထပိုဲဍောတ် ပွိုၚ်ဍုၚ်ရေဝ်ရ။
နိပေါန်ဖှံၚ်ဒေရှေန် ဂွံလဝ်အခေါၚ်ပါမေတ် နူကဵုအလဵုသဳကၟိန်ဍုၚ်ဗၟာ သွက်ဂွံသိုၚ်ပတန် သ္ၚိ (၃၀၀)မ ပ္ဍဲလေကေကဝ်၊ ကေုာံဍုၚ်တၟိမွဲ ပ္ဍဲတွဵုရးဍုၚ်ကရေၚ် ပ္ဍဲခရိုၚ်ဍုၚ်မြဝတဳ နူ ၂၀၁၆ ကဵု ၂၀၁၇ တေံရ။
ပရိုၚ်စၠောံဘာသာ
ပရိုၚ်တမ်မူလ:
https://www.bnionline.net/en/news/nippon-foundation-pledges-30m-mon-and-karen-states