၂။ ပရေၚ်ဍုၚ်ကွာန်
၂. ၁။ ပရေၚ်ဍုၚ်ကွာန်ဟီု ပရေၚ်မၞိဟ်ရ၊ ဍုၚ်ကွာန်ဂှ်ဒှ်ဌာန်မၞိဟ် တအ်ကောံမံၚ်တုဲ ကၠောန်ပရေၚ်ဍုၚ်ကွာန်ဟီုဂှ်ကၠောန်သွက်မၞိဟ်တအ်ရ။ သွက်မၞိဟ်တအ် ဂွံစသုၚ်မံၚ်စံၚ် ဗိုက်လတက်ခိုဟ်ဟ် ဂွံတိက်ဂွံမံၚ်ခိုဟ်ဟ် ဂွံမံၚ်အာညဳညဳသာသာ ပြသၞာညံၚ်ဟွံဂွံဒှ် ဒးပြုပြေၚ်ဖန်ဇန်မံၚ်တအ်ဂှ် ဒှ်ကမၠောန်ပရေၚ်ဍုၚ်ကွာန်ရ။
၂. ၂။ ပ္ဍဲကၟိန်ဍုၚ်မွဲမွဲဂှ် ဂကူနာနာ ဘာသာနာနာ ကဆံၚ်မၞိဟ်နာနာ ကွပ်မၞိဟ်နာနာနွံမံၚ်တုဲ ဂွံမံၚ်အာညးသ္ကအ်မွဲစွံလအ်အ်မာန် ညံၚ်ဟွံဂွံဒှ်ပြသၞာဂှ် ဒးချူခၞံလဝ်ဥပဒေနာနာရောၚ်။ သၞောဝ်ဥပဒေတအ်ဂှ် ဒးရးညဳသၟဟ်မံၚ်မ္ဂး ပြသၞာအောန် ဍုၚ်ကွာန်ၜိုဟ်တုဲ ပရေၚ်ပိုန်ဒြပ်သိုက် သၠဲတိုန်ရ။ ပရေၚ်ပိုန်ဒြပ်သိုက်သၠဲတိုန်မ္ဂး ကဆံၚ်ဒၟံၚ် ဘဝမၞိဟ်သၠုၚ်တိုန် ပရေၚ်ပညာ ပရေၚ်ထတ်ယုက်တအ်လေဝ်သၠုၚ်တိုန်တုဲ မၞိဟ်တအ်ဂှ် ဒှ်တသိုက်စိုတ် တသိုက်ကာယရောၚ်။
၂. ၃။ ပရေၚ်မၞိဟ်ဂှ် မၞိဟ်တအ်ဟေၚ်ဖန်ဇန်မံၚ်ရ။ သၞောဝ်ဒက်ပ္တန်အုပ်ဓုပ် ပကၚ်ရၚ်ဍုၚ်ကွာန်နာနာတအ်ဂှ်လေဝ် မၞိဟ်တအ်ဟေၚ် ချူကေတ် ခၞံကေတ်ရ။ သဘာဝမၞိဟ်တအ်ဂှ် လပါ်ဇကုဟေၚ် ဇကုညာတ်ဂၠိုၚ် သွက်မၞိဟ်ဗွိုၚ်ဇကု ဂွံခိုဟ်ဟေၚ် ဇကုကဵုဖျုန် ဒှ်လေပ်ရ။ ဟိုတ်ဂှ်ရ မၞိဟ်လၟိဟ်အောန်ဂွံလဝ်အဝဵုမ္ဂး ညဳသာသၞဟ်န်အောန်တုဲ ပြသၞာကတဵုဒှ်ဂၠိုၚ်ရ။ ဒၟာနူဏံတုဲ သၞောတ်ဨကရာဇ်သၞောတ်တၠ အဝဵုတအ်ဂှ် မၞိဟ်ဂမၠိုၚ်ဟွံဒုၚ်တဲ ဒးပၠိုတ်ဇြ ကၠုၚ်မံၚ်ရောၚ်။
၂. ၄။ ပရေၚ်ဍုၚ်ကွာန်ဂှ် ဒှ်ပရေၚ်မၞိဟ်ဂမၠိုၚ်၊ မၞိဟ်ဂမၠိုၚ် အခေါၚ်ဟီုဂးပြုပြေၚ် ကဵုသ္ဂုတ်သွာတ်နွံဟေၚ် ပြေပြံၚ်ကလိတ်ကလောတ်ဂၠိုၚ်တုဲ ပဋိပက္ခအောန်ရောၚ်။
၂. ၅။ မၞိဟ်ဂွံအဝဵုတအ်ဂှ် စွံစိုတ်ဟွံဒး သၞောဝ်ဥပဒေတအ်ဂှ် ဟွံဓဝ်ယာ ဗက်မံၚ်လပါ်ဂကူမွဲမွဲ သာသနာမွဲမွဲ ကဆံၚ်မၞိဟ်မွဲမွဲ ကွပ်မၞိဟ်မွဲမွဲမ္ဂး မၞိဟ်တၞဟ်တအ်ဂှ် ဒုၚ်တဲဟွံမာန်တုဲ ပြသၞာကတဵုဒှ်ကၠုၚ်ရ။ လ္တူပြသၞာတအ်ဂှ် ရပ်စပ် သောၚ်ကလးဟွံလေပ်မ္ဂး ဒှ်ကၠုၚ်ပဋိပက္ခ လ္တူပဋိပက္ခဂှ် ပတှ်ေဇြဟတ် သောၚ်ကေတ်ကဵုလွဟ်မ္ဂး ပၞာန်အပ္ဍဲဍုၚ်ကတဵုဒှ်ကၠုၚ်ရ။
၂. ၆။ ပြေၚ်ဂၠဴတအ်ဂှ် စကာကေတ်နကဵုအဝဵုဂွံဆဂးဗလးလဝ်ဍေံ သၟးဂှ် ဟွံဒှ်ကမၠောန်၊ မၞိဟ်တအ်ဂှ် နွံကဵုက္ဍဟ်နွံကဵုညာဏ်ပညာတုဲ စကာကေတ်နကဵုအဝဵုဂှ် ဟွံမိက်ဒုၚ် ဆ္ဂး ဖန်ဇန်လေပ်မ္ဂး ဟွံဗက်ရံၚ်လေဝ် ဍေံကၠောန်ကဵု မာန်ဖအိုတ်ရ။
၂. ၇။ သဘာဝမၞိဟ်တအ်ဂှ် နွံပၟိက်ကဵုအခေါၚ်ဗၠးၜး အခေါၚ်အရာတုပ် ပရေၚ်ဓဝ်ဍာံရ၊ လ္တူသဘာဝဏံဂှ် တီလဝ်တုဲစွံၚုဟ်မးဖျေံဗီု ဖန်ဇန်အာမ္ဂး ပြသၞာအောန် ညဳသာ သၟဟ်န်ဂၠိုၚ်ရောၚ်။
၂. ၈။ ကၟိန်ဍုၚ်ဒက်ပတန်လဝ် နကဵုဂကူဂမၠိုၚ်တအ်ဂှ် ဂကူမွဲမွဲ ကေတ်လဝ်အခေါၚ်တၟေၚ်တုဲ အုပ်ဓလီုလဝ်လ္တူဂကူ တၞဟ်ဟ်မ္ဂး ဂကူတၞဟ်ဟ်တအ် ဒုၚ်မာန်ဟွံသေၚ်၊ ဗီုဂှ်ကီု သာသနာမွဲမွဲ ကေတ်လဝ်အခေါၚ်တၟေၚ်တုဲ ဍိုက်လဝ် သာသနာတၞဟ်ဟ်မ္ဂး ရဲရှေ်သှေ်သာသနာတၞဟ်တအ် ဒုၚ်တဲမာန်ဟွံသေၚ်ရ။ ပရေၚ်ညဳသာသၟဟ်န်ဂှ် ဒးဒက်ပ္တန်ကုအခေါၚ်အရာတုပ်သၟဟ် ပရေၚ် ဓဝ်ယာရောၚ်။
၂. ၉။ ကောန်ၚာ်ဗျဵုတှ် လရိုဟ်မံၚ်ဂှ် ဟွံကဵုမဴတှ် တက်ကဵုလေံမ္ဂး သွက်ကောန်ၚာ်လေဝ်ဟွံဒှ်ဖဵု သွက်ယာဲလေဝ်ဟွံဒှ်ဖဵုရ။ ဗီုဂှ်ကီု ဂကူကောန်ဍုၚ်အရၚ်တအ် အာတ်မိက်မံၚ် အခေါၚ်အရာဍေံတအ်ဂှ် ပဲါနူဟွံကဵု ဍဵုဍိုက်ပျဲပျာံဍေံပၠန်မ္ဂး သွက်ညးလဵုလေဝ် ဒှ်ဖဵုဂုဏ်ဟွံသေၚ် ပတဝ်အာကဵု ဆီပါ် ဍာ်ဇွောဝ်ဟေၚ်ရ။
၂. ၁၀။ ရဲဒးဒုၚ်ဍဵုဍိုက် ဒးဒုၚ်ၜုၚ်တက်မံၚ်တအ် လရိုဟ်ယာံမံၚ် သ္ၚိတ်တ်မ္ဂး ညးတၞဟ်ဟွံမိၚ် မၞိဟ်ကၠုၚ်ရီုဇကုဟွံမွဲ ဒးလရိုအ်ယာံထတ်တ် ညံၚ်မၞိဟ်ဂမၠိုၚ် သ္ဂောံမိၚ် သ္ဂောံတီရောၚ်။ ဟိုတ်ဂှ်တုဲ ရဲဒးဒုၚ် ဍဵုဍိုက်မံၚ်တအ် ဒးကဵုဇြဟတ် ကုရဲပရးပရိုၚ်ရောၚ်။
၂. ၁၁။ ဂကောံမၞိဟ် ဇြဟတ်ဍောတ်ဖျေံသၞဟွံမာန်တအ်ဂှ် ဒးဂၠာဲ မိတ်ဂၠိုၚ်ၚ်ရောၚ်။ နကဵုဇြဟတ်မိတ်ဂမၠိုၚ်ဟေၚ် ဒးပြေၚ် ဇန်အာ ပေဲါဗ္တိုက်ရောၚ်။
၂. ၁၂။ ကၠောန်ပၠန်ဂတးမ္ဂး သၞ-သၞဇကုတအ်ဂှ် ညံၚ်ဒှ်မိတ်ဇကု ဒးကၠောန်မိတ်-သၞဇကုတအ်ဂှ် ညံၚ်ဟွံဂွံဒှ်သၞဇကု ဒးစွံသတိရောၚ်။
၂. ၁၃။ ကၠောန်ပၠန်ဂတးမ္ဂး ဂစာန်မံၚ်ပ္ဍဲဗွိုၚ်ဂကူဇကုသၟးဂှ် တုပ်တဴညံၚ်ရဴဝေၚ်ဒၟံၚ်ပၞာန်ဒုၚ်ဟေၚ်တုဲ ဂကူကောန်ဍုၚ်အရၚ်ဂမၠိုၚ် ညံၚ်ဂွံညဳသၟဟ် ဇြဟတ်ဒစဵုဒစးမံၚ်ကုသၞဂမၠိုၚ် ညံၚ်ဂွံညဳသာ လုပ်အာပေဲါဗတိုက်မွဲစွံဂှ် တုပ်တဴပၞာန်ထ္ပက်ရ။
- ပၞာန်ဒုၚ်သၟးဂှ် ကေတ်ပေဲါအံၚ်ဇၞးဟွံမာန် ပၞာန်ထ္ပက်ဟေၚ် ကေတ်ကဵုပေဲါအံၚ်ဇၞးမာန်တုဲသီုဒှ်ပၞာန်ဒုၚ်ခိုဟ် မွဲသာ်ကီုရောၚ်။
၂. ၁၄။ မိက်ဂွံပလေဝ်မၞိဟ်မ္ဂး ဒးပလေဝ်စိုတ်ဓါတ်မၞိဟ်ရောၚ်။ သွက်ဂွံပလေဝ်စိုတ်ဓါတ်မၞိဟ် ဍိုက်ကေတ် ပရာန်ကေတ်သၟးဟွံဂွံ ဟွံစိုပ်တရဴ၊ ညံၚ်ဍေံဂွံကၠး ဂွံဒုၚ်တဲမာန် သောၚ်ကလး ဖန်ဇန်ကေတ်ဟေၚ် စိုပ်တရဴဂၠိုၚ်ရ။
၂. ၁၅။ ဓဝ်ၜိုဟ်လလမ်ဂှ် ၚုဟ်မးဇၞော်မံၚ်ကွေံရ၊ ဆ္ဂးဒၞာဲလ္ၚဵု သၠာဲကဵုဆီပဠက်တုဲဟေၚ် ကလိဂွံမာန်ရ။
၂. ၁၆။ ဓဝ်ဍာံတအ်ဂှ် ဒၞာဲလ္ၚဵု ဟီုကေတ်သၟး မၞိဟ်ဟွံဒုၚ်တဲ ဂံၚ်ပြိုၚ်ပကာန်တုဲဟေၚ် ညးဂမၠိုၚ် ဒုၚ်တဲလေပ်ရ။
၂. ၁၇။ ကဆံၚ်တုပ်ဟီုဂှ် ဇြဟတ်ဇကုဟွံမွဲ ညးမွဲဟွံဒုၚ်တဲ၊ ထ္ၜးဇြဟတ်မာန်မ္ဂး ညးညးအဲအဲ ဒုၚ်ကၠုၚ်တဲရောၚ်။
၂. ၁၈။ မၞိဟ်တအ်ဂှ် ပၟိက်ဆန္ဒနွံ စိုတ်ဂံၚ်သကာနွံ ပညာနွံမ္ဂး အရာအိုတ်သီု ကၠောန်သ္ပမာန်ဖအိုတ်ရ။
၂. ၁၉။ ယဝ်ကၠိုဟ်နဲကဲ “စဲဂစိုတ်ဇာဒိသိုၚ်မာန် ဂစေံအဃိုတ်ဂစိုတ်စိၚ်” ကေၚ်မိၚ်သေၚ်ဟာ။
၂. ၂၀။ ကမၠောန်ပၠန်ဂတးဂှ် ပံၚ်ဗစပ်ကဵုကွတ်ပရေၚ်စန်ဒက်တုဲဟေၚ် ညးဂမၠိုၚ်စှေ်စိုတ်ဒုၚ်တဲရောၚ် ပံၚ်ဗစပ်ကဵုကွတ် ပရေၚ်စန္ဒက်ဟွံမွဲမ္ဂး ညးဂမၠိုၚ်ညာတ်ဗၠေတ် ဖေက်လကိုတ်ဝေၚ်ပဲါအိုတ်ရောၚ်။
၂. ၂၁။ ရဲဂွံလဝ်အဝဵု အုပ်ဓုပ်လဝ်ဍုၚ်တအ် ပတှ်ေမံၚ်ဇြဟတ် ဒပ်ရပ်လွဟ် သောၚ်မံၚ်ပြသၞာနကဵုလွဟ်သၟးမ္ဂး ရဲပၠန်ဂတးတအ်လေဝ် ဒးပခိုၚ်လဝ်ဇြဟတ် ရပ်လွဟ်ကီုရ။ ၜိုန်ဂှ်လေဝ် ဇြဟတ်ရပ်လွဟ်ဂှ်ဒးသ္ပပၞာန်ဒုၚ်တုဲ ဒးထ္ပက်ပၞာန် နကဵုပရေၚ်ဍုၚ်ကွာန်ရောၚ်။
၂. ၂၂။ ပ္ဍဲကဵုပေဲါပၞာန် ဂံၚ်ပြိုၚ် ဂံၚ်ဗ္တိုက် ဂံၚ်ဒုၚ်ချိုတ်တုဲ ပ္ဍဲပေဲါ ပရေၚ်ဍုၚ်ကွာန် ဟွံဂံၚ်ပြိုၚ် ဟွံဂံၚ်ဒတူလိုၚ် ပိုတ်တ်မ္ဂး ဒှ်ရဲပၠန်ဂတးဇေတ်တ်ဟွံသေၚ်။
၂. ၂၃။ ရန်ကဵုဍုၚ်မ္ဂး ပုၚ်ကဵုခုၚ်ဂှ် လ္ပရံၚ်ညိ၊ ဒုၚ်ကေတ်တဲ ပုၚ်- ကဵု-ခုၚ်မ္ဂး ဍုၚ်ဂှ် သ္ၚောဲအာ ကၠေံအာမာန်ရောၚ်။
၂. ၂၄။ ရဲဂွံလဝ်အဝဵုတအ်ဂှ် ပုၚ်-ကဵု-ခုၚ်ဟေၚ် ဍေံဒုၚ်ကဵုမာန် ဍုၚ်ဂှ် ဍေံဒုၚ်ကဵုလောဲလောဲဟွံသေၚ် ဍေံကြေပ်ကွေံကွေံဟေၚ် ဍေံကဵုမာန်ရောၚ်။
၂. ၂၅။ ဒက်ပ္တန်ဍုၚ်ဂှ် နကဵုပေဲါဗ္တိုက်ရပ်လွဟ်မွဲသာ်ဓဝ် ဟွံရုမ်ဂပ် ဟွံစိုပ်တရဴ ဒးပံၚ်ဗစပ်ကဵု ပေဲါဗ္တိုက်နာနာရောၚ်။
၂. ၂၆။ သၞဗ္တိုက်ကၠုၚ်နကဵုပၞာန်မ္ဂး ကောန်ပၞာန်ဒးဒုၚ်လေၚ်ဆောံ ဂၠိုၚ်၊ ဗ္တိုက်ကၠုၚ်နကဵုပရေၚ်ဍုၚ်ကွာန်မ္ဂး ညးအာက္ဍိုပ်တအ် ဒးဒုၚ်လေၚ်ဆောံဂၠိုၚ်ရ။
၂. ၂၇။ သၞဗ္တိုက်ကၠုၚ် နကဵုပရေၚ်ဍုၚ်ကွာန်ဂှ် ဒးဖေက်ဂၠိုၚ်နူ ပရေၚ်ပၞာန်ဏီရောၚ်။ အပ္ဍဲဝၚ်ဒဒှ်ဍုၚ်ပိုဲဏံ ဂကောံပၠန်ဂတး ဒးဒုၚ်ဗ္တိုက်ကၠုၚ်နကဵုပၞာန်တုဲ အိုတ်အာဟွံမွဲဏီ ဒးဒုၚ်ဗ္တိုက်ကဵုပရေၚ်ဍုၚ်ကွာန် အိုတ်အာနွံကၠုၚ် ဗွဲမဂၠိုၚ်ရောၚ်။
၂. ၂၈။ ရဲဂွံလဝ်အဝဵုတအ် ပတှေ်ဇြဟတ်ပၞာန်တုဲ ဒတူလိုၚ်ကၠောန်ၜိုတ်မံၚ်မ္ဂး ရဲနွံပၟိက်ကဵုအခေါၚ်ဗၠးၜးတအ် ဂၠာဲနဲပညဳပတှေ်မံၚ်နဲဒဳမဝ်ကရေဇြဳသၟးဟွံဂွံ ဟွံရုမ်ဂပ်ရ။ ဒးပတှ်ေဇြဟတ်ပၞာန်ကီုရောၚ်၊ ဍေံဟွံပြံၚ်အခိုက်မ္ဂး ဇကုလေဝ်ပြံၚ်ဟွံဂွံ ဇကုပြံၚ်သၠာဲဒးလောဲလောဲမ္ဂး ဇကု အိုတ်အာရောၚ်။
၂. ၂၉။ ဒပ်ပၞာန်ဂှ် ဒှ်ဇြဟတ်သွက်ဂွံဗ္တိုက်ပၞာန်သၟး ဟွံသေၚ် ပ္ဍဲအရာတက်ကျာလ္တူခုၚ်လဝ် ဒှ်ဇြဟတ်သဇိုၚ်ဇၞော်ဇၞော် မွဲကီုရောၚ်။
၂. ၃၀။ ဍာ်ဂၠိုၚ်မ္ဂး ရပ်ကဝါတ်၊ ညာတ်သာ်ဂှ်တုဲ ဖံက်ပ္တိတ်မံၚ်ဍာ်မ္ဂး ကတအ်ဒးစွံသတိဇၞော်ဇၞော်ရောၚ်။
၂. ၃၁။ ဂကူမန်ပိုဲဗွဲမဂၠိုၚ်တအ်ဂှ် ရှေ်သှေ်ထိုၚ်သးမံၚ် ဨကရာဇ်ဇကု ဝါရေဝ်ရောဝ်၊ ရာဇာဓိရာဇ်၊ သ္ကိုပ်ပၞာန်ဗြာဇ္ဇ၊ ဗညာမသာန်၊ တၠဗါန်တအ်ရ၊ ဆ္ဂး ဇကုညးတအ် ညံၚ်ဂွံဒှ်သာ်ဂှ်ကီုဂှ် ညးတံ ဟွံဂစာန်တုဲ ပရေၚ်ဗၠးၜးဂကူပိုဲ ဒးလ္ဇုဲမံၚ်ရောၚ်။
၂. ၃၂။ စိုတ်ဓါတ်ဂကူမန် ကောန်ဗုဒ္ဓဘာသာတအ် ကောန်တြုံစိုပ်အဝဲမ္ဂး ထဴကဵုသ္ပထပိုဲ၊ သ္ပခမဳဟေၚ်နွံ၊ ဗီုဂှ်ကီုယဝ်ထဴကဵုယိုက်ဂၠေၚ်ပရေၚ်ဂကူကီုမ္ဂး ဂကူပိုဲဗၠးၜးတိတ်နူ ဘဝဍိက်ပြဟ်ဟ်ရောၚ်။
၂. ၃၃။ ပ္ဍဲအခိၚ်ကာလ ဒးဂစာန်ဒက်ပ္တန်မံၚ် ပရေၚ်ဆာန်ကၟိန် အလုံဂကူမန်ဂှ် ညးလ္ၚဵုတအ် ဓမံက်ပတိုန်ဒုဟ်တၚ်ပူဂဵု-ဂကောံလညာတ်ဟွံတုပ်ကဵုဇကု ကမၠောန်ဟွံတုပ်ကဵုဇကု တအ်တုဲ ပရးမံၚ်လညာတ်ပရးမံၚ်လိက်ရ။ ပူဂဵုသာ်ဝွံဂှ် ဒှ်ပူဂဵုဆာန်ဂကူ ပူဂဵုစွံအဓိကကဵု ပရေၚ် ဂကူဟွံသေၚ် ဒှ်ညးပလီုပရေၚ်ညဳသၟဟ်ပ္ဍဲဂကူ ဒှ်ညး ရံၚ်ဂုဏ်ဖဵုအတ္တရောၚ်။
၂. ၃၄။ ညးလ္ၚဵုတအ်ဂှ် ကၠာဟွံဂွံကဆံၚ်ဒၞာဲဏီ ဂၠာဲရုဲဟီုဂလာန် ညးဂမၠိုၚ်ဒးစိုတ်ရ။ ဂွံဒၞာဲတုဲမ္ဂး လ္တူမၞိဟ်လညာတ်ဟွံတုပ်ကဵုဇကုတအ်ဂှ် ဍဵုဍိုက်သ္ပမာန်တုဲ ဂၠာဲစဖဵုဂုဏ်သွက်ဇကုရ။
၂. ၃၅။ ညးဆာန်ဂကူတအ် အခါချပ်၊ အခါဟီု၊ အခါကၠောန် ဖဵုဂုဏ်ကောန်ဂကူဂှ် စွံဂတ၊ ပရေၚ်အတ္တ မာန ဂိုဏ်ဂနတအ်ဂှ် ပဲါတးမာန်မ္ဂး ပရေၚ်ညဳသာသၟဟ်န် ပ္ဍဲကောန်ဂကူပိုဲ တောတက်ဇၞော်မောဝ်ကၠုၚ်တုဲ အာစိုပ်တိုၚ်ပ္ကဴပြဟ်ရောၚ်။
၂. ၃၆။ ကျပၞာန် လေၚ်ဌာန်ဒေသ၊ ကျပရေၚ်ဍုၚ်ကွာန် လေၚ် သီုမသ။
၂. ၃၇။ ကၠောန်ပရေၚ်ဂကူပ္ဍဲဗွိုၚ်သၞောဝ်ဟွံဂွံတုဲ ဒးရပ်ကၠုၚ်လွဟ်၊ ဗော်ပၠတရဴဍုၚ်မန် ဗလးဒးလွဟ်တုဲ လေၚ်ဆောံ ကၠုၚ်ဂွံဆဵု၊ သၟဝ်သၞောတ်တၠအဝဵု ထပ်ဗလးလွဟ်တုဲ လုပ်ကၠောန်ပၠန်မ္ဂး ဒှ်ဖဵုဂုဏ်မာန် ဟွံမာန်ဂှ် ဟွံဒးသၟာန်တၠပ ညာ သၟာန်ရံၚ်ကောန်ၚာ်လေဝ် တီမာန်ရောၚ်။
၂. ၃၈။ အခိုက်သၞောတ်ဒဳမဝ်ကရေဇြဳ ဓမ္မတာမ္ဂး ဒးဗက်ဆန္ဒ လပါ်မၞိဟ်ဂၠိုၚ်ဟေၚ်ရ။ ပ္ဍဲကၟိန်ဍုၚ်ပံၚ်ကောံ ဂကူဂမၠိုၚ် နွံမံၚ်တအ်ဂှ် ဗက်ဆန္ဒလပါ်လၟိဟ်မၞိဟ်ဂၠိုၚ်သၟးမ္ဂး ဂကူ လၟိဟ်မၞိဟ်အောန်တအ် ဒးဒုၚ်အုပ်ဓလီုလဝ်လၟိုန်ရောၚ်။ ဟိုတ်ဂှ်တုဲ ဂကူမွဲကဵုမွဲ အခေါၚ်အရာတုပ်ဂှ် ဒးနွံမွဲအခဏ်ကီုရောၚ်၊ ပရေၚ်ဂကူညးညးဖန် အခေါၚ်ဏအ် နွံကီုဟေၚ် ပရေၚ်ညဳသာသၟဟ်န်ဂကူဂမၠိုၚ်ဂှ် ထိၚ်ဒဝ်အာမာန်ရောၚ်။
၂. ၃၉။ ရဲကောန်မျူနေတ် သဵုယှေဝ်လေတ်တအ်ဟီု ပြသၞာကောန်ဂကူတအ်ဂှ် နွံသၟဝ်ပြသၞာ ကဆံၚ်မၞိဟ်ရောၚ်၊ ပြသၞာကဆံၚ်မၞိဟ်သောၚ်ကလးတုဲမ္ဂး ပြသၞာကောန်ဂကူတအ်ဂှ် လာဲလေၚ်ပြေပြံၚ်အာကေတ်တ်ရောၚ်ဂးရ။ ဆ္ဂးဍုၚ်သဵုဗဳယေတ် ( ရုယှာ) ဍုၚ်ယူဂဵုသဠာဗဳယာ ညးမဒှ်ကၠုၚ် အ္စာကောန်မျူနေတ် သဵုယှေဝ်လေတ်တအ်ဂှ် ထကးပြးအာတုဲ ဒှ်ကၠုၚ်ဍုၚ် ဂကူညးကဵုညးဂှ် ပဲါတးထောံ ဂလာန်ညးတအ်သၟးဟွံသေၚ် ပြသၞာကောန်ဂကူဟေၚ် ဒှ်တိုၚ်ရောၚ်ဂှ် ထ္ၜးဏာသက်သဳရ။
၂. ၄၀။ ရဲဒဳမဝ်ကရေဇြဳတအ်ဟီု အခေါၚ်အရာကောန်ဂကူဂှ် အခေါၚ်အရာမၞိဟ်မွဲသာ်ရ။ ဒဳမဝ်ကရေဇြဳဂှ် ဖန်ဗဒှ်ကဵုအခေါင်အရာပရေၚ်မၞိဟ်နာနာသာ်ရောၚ်တုဲ ဂွံဒဳမဝ်ကရေဇြဳမ္ဂး အခေါၚ်အရာကောန်ဂကူတအ်လေဝ် ဂွံကီုရောၚ်ဂးရ။ ဆ္ဂး ပ္ဍဲဍုၚ်ဒဳမဝ်ကရေဇြဳ အိန္ဒိယ၊ သေံ၊ အေန်ဒဝ်နဳယှာ၊ ဖိလိတ်ပိန် တံဂှ် ပြသၞာကောန်ဂကူ ဒှ်မံၚ်ဖိုဟ်ရောၚ်။ ဍုၚ်ပိုဲခေတ် ( ဖ-ဆ-ပ-လ ) တေံ စကာကၠုၚ် သၞောတ်ဒဳမဝ်ကရေဇြဳကီုရ။ ဆ္ဂး ပဋိပက္ခ ကောန်ဂကူကတဵုဒှ်ကၠုၚ်ပၞာန်ပ္ဍဲဍုၚ်စဒှ်ကၠုၚ် နူခေတ်တေံရ။
၂. ၄၁။ ပရေၚ်ကောန်ဂကူဂှ် နွံသၟဝ်ပရေၚ်လဵုဟွံသေၚ် ဒှ် ပရေၚ်ပၟိက်ဇၞော်မွဲရောၚ်။ စေဝ်ဗွိုၚ်စဵုဗိုၚ်လဝ်မၞိဟ်တအ် ဇၞော်အိုတ်ဂှ် ပါ်လဝ်ပယျဵုကၟိန်ဍုၚ် ဒုၚ်သဇိုၚ်လ္တူဂကူညး ကုညးရောၚ်၊ ဝါဒဗီုလဵုပြံၚ်ၚ် ဂကူဂွံပြံၚ်ဂှ်ဟွံလောဲ ပရေၚ်ဂကူဂှ်ဟေၚ် ဒှ်ကြက်ရောၚ်။
၂. ၄၂။ ခေတ်ဏံဂှ် ခေတ်ဓမံက်သၠုၚ်ပ္တိုန် အခေါၚ်အရာမၞိဟ်၊ ပ္ဍဲခေတ်ကာလဏံ ပိုဲရုန်ဂစာန်အာတ်မိက် လုပ်မံၚ်ပေဲါ ဗ္တိုက်သွက်အခေါၚ်အရာပိုဲဂှ် ဒးမံၚ်ကဵုဇွောဝ်ဍာ်ခေတ် ကာလတုဲ ကမၠောန်ပိုဲဇၞော်မောဝ် တောတက်အံၚ်ဇၞးရောၚ်။ ကမၠောန်ပွဍဵုဍိုက်ၚိတ်ကလက်ဂကူညးတၞဟ်တအ်ဂှ် ဒစဵုဒစးမံၚ်ကုဇွောဝ်ဍာ်ခေတ်တုဲ ဒးဟောံဗြံဗၠိုက်တၞီအာရောၚ်။
၂. ၄၃။ တ္ၚဲဏံ ပၟတ်ပၞာန်ဂၠးကဝ် ၜိုန်ပၠိုတ်ဇြစှ်ေကၠာလဝ် ပၟတ်ပၞာန်ၚိတ်ကၠက်ဂကူ ဂဵုတူမံၚ် ပ္ဍဲကၟိန်ဍုၚ်ဗွဲမဂၠိုၚ်ဏီရောၚ်။
၂. ၄၄။ အပ္ဍဲသၞောတ်ဒဳမဝ်ကရေဇြဳ အလဵုအသဳဟွံခိုဟ်တအ်ဂှ် ၜိုန်ရပြံၚ်သၠာဲထောံ နကဵုပေဲါရုဲမာဲမာန်ကၠာလေဝ် အခိၚ်အဝဵုဍေံနွံ ဍေံကြံကြ သ္ပမာန်ဂွံမံၚ်ဏီရောၚ်၊ သွက်ဂွံစဵုဒၞာ ဂကူဇကု ဒပ်ဇကု ထေက်ကဵုဒးစွံလဝ် ဏီရောၚ်။
၂. ၄၅။ ကဵုသြန်မာန်မ္ဂး စကာဂွံဖအိုတ် ၜိုန်ဟီုဂးမံၚ်နွံကၠာလေဝ် ကမၠောန်ပၠန်ဂတး သွက်ဗၠးၜးဂကူဂှ် စကာကေတ်ကုသြန်ဂွံမာန်ဟွံသေၚ် စိုတ်ဓါတ်ဆာန်ဂကူ ညံၚ်ဂွံကြံၚ် ပၠုပ်ကဵုမာန်မ္ဂး ဟွံဒးကဵုသြန် မၞိဟ်ဂမၠိုၚ် ကတဵုကၠောန် ကေတ်တ်ရောၚ်။
၂. ၄၆။ ပူဂဵုမွဲမွဲ လညာတ်ပရေၚ်ဍုၚ်ကွာန် ၜိုတ်လဵုနွံနွံ ဝၚ်ပရေၚ် ကောန်ဂကူ ၜိုတ်လဵုကၠိုဟ်ဟ် ဓဝ်အတ္တမွဲ အုပ်ဓလီုမံၚ်မ္ဂး သွက်ဂကူသ္ဂောံဗၠးၜးဂှ် ဒုၚ်အိုတ်ဒုၚ်ချိုတ်တုဲ ကၠောန်မာန်ဟွံသေၚ်၊ ယဝ်ကၠောန်လေဝ် အခိၚ်သာဟေၚ်လုပ်ကၠောန် အခိၚ်ကြေပ်မ္ဂး ပဲါဒဴအာပၠန်ရောၚ်။
၂. ၄၇။ ဗိုလ်ပၞာန်ကဆံၚ်သၠုၚ် ဘဝၚ်ပၞာန်သၠုၚ်မံၚ်တအ်ဂှ် လညာတ်ပရေၚ်ဍုၚ်ကွာန်ဟွံသၠဲ စိုတ်ဆာန်ဂကူဟွံပြဲမ္ဂးကၞောတ်တဲဒုၚ်စကာသၞ ဒုၚ်သ္ပတဝ်မုဲဒှ်အာလေပ်ရ။
၂. ၄၈။ ညာတ်ကၠစမံၚ်ဖျုန် အာဒုၚ်ဂုဏ် အာတ်စဍေံဂှ် ဒှ်ထပ် ပလံၚ်ဏာဖျုန်ကဵုဍေံရောၚ်။
၂. ၄၉။ မၞိဟ်ပတှ်ေစောံတုဲ ဍိုက်ကၠတအ်ဂှ် ကၞောတ်တဲ စိုပ် အာ ပ္ဍဲဗုၚ်ကၠသၟးရ။
၂. ၅၀။ “မိက်ဂွံစၜဴလုပ်ဗ္ဒစိၚ်” စိၚ်လိုန်စိၚ်ထ္ပက်လေပ်မံၚ် စွံသတိ ညိ။
၂. ၅၁။ ပ္ဍဲခေတ်ကာလဏအ် အလဵုအသဳဍိုဟ်ကေက်တအ်ဂှ် ဒက်မိက်ကုညးတၞဟ်တုဲ ဂၠာဲဂၠံက်သယံဇာတ ပိုန်ဟာန်ညးတၞဟ် အလဵုအသဳကြအ်ဒိုဟ်တအ်ဂှ် သ္ပသၞဍဵုဍိုက်ၚိတ်ကလက်ဂကူညးတၞဟ်ရ။
၂. ၅၂။ ဍုၚ်ဇကု ညးတၞဟ်သၠာဲကဵုဆီပလက်တုဲ ပၠံၚ်ကေတ် ဂွံဏာလဝ်တအ်ဂှ် ပၠးတဲတုဲ ဇကုကလေၚ်အာတ်ကေတ် ဂွံမာန်ဟွံသေၚ်ရ။
၂. ၅၃။ ရဲပၠန်ဂတးတအ်ဂှ် ၜိုန်သီအဝဵု ဖျေံအလဵုအသဳဟွံမာန် ဏီကၠာလေဝ် ကဵုဒဒိုက်ပလီုကမၠောန် ရဲဂွံလဝ်အဝဵုတံဂၠိုၚ်ဂၠိုၚ်မာန်မ္ဂး ညးဂွံလဝ်အဝဵုတအ် ဒးချပ်ဗစာကၠုၚ်ရောၚ်။ ပွညးတအ် အုပ်ဓလီုမံၚ်လ္တူညးတၞဟ်ဂှ် ဖဵုဂုဏ်ဟွံမွဲ ဒှ်မံၚ်လလေၚ်ဖဵုရောၚ် ညးတံညာတ်ကၠုၚ်မ္ဂး ပွအုပ်ဓလီုလ္တူညးတၞဟ်ဂှ်ဒေံါအာကေတ်တ်မာန်ရောၚ်။
၂. ၅၄။ သဘာဝတၠအဝဵုတအ်ဂှ် ပဲါတိတ်နူကဵုဒၞာဲပြံၚ်လှာဲအဝဵု ကဵုညးတၞဟ်ၜိုဟ်ဟ်ဟွံမွဲ၊ ပေဲါရုဲမာဲကဆံၚ်ဍေံတံ ဒးပဲါကဵုဒၞာဲမာန်ဂှ်လေဝ် ကၠောန်ကဵုမာန်ဟွံသေၚ်ရ။
၂. ၅၅။ သၟဝ်သၞောတ်တၠအဝဵုဂှ် ဍုၚ်ပံၚ်ကောံဇေတ်တ် ( သၞောတ် ဝှေတ်ဒရာ ) တ္ၚဲလဵုလေဝ်ဒှ်ဟွံမာန်၊ သဘာဝသၞောတ်တၠအဝဵု ပူဂဵုမွဲ ( ဝါ ) မၞိဟ်မွဲဂကောံဍောတ် ရပ်လဝ်အဝဵုဖအိုတ်ရောၚ်။ သၞောတ်ဍုၚ်ပံၚ်ကောံဇေတ်တ်ဂှ် ပါ်ပရအ်ကဵုအဝဵုကု တွဵုရးဍုၚ်ညးကဵုညးရောၚ်တုဲ သၞောတ်ၜါဏံဂှ် ဒစဵုဒစးမံၚ် ညံၚ်ဗၟံက်ကဵုပလိုတ်ရောၚ်။
၂. ၅၆။ ဂကောံအဲဇြဟတ်ဇၞော် ဂကောံအဲဆဵုဂဗဂၠိုၚ် ဂကောံ အဲကဆံၚ်သၠုၚ်မံၚ်ဂးတုဲ ဒက်ဂကောံပံၚ်ကောံ (ဝါ) ဒက်ပတန်ဓဝ်ညဳသာ ကဵုဂကောံတၞဟ်ဟ်ဂွံဒှ်ဟွံလောဲ။
၂. ၅၇။ “ၚဴချိုတ်ဂုဏ်ရမျာၚ် မၞိဟ်ချိုတ်ဂုဏ်ပါၚ်” ဇြဟတ်ဟွံပေၚ် ဃရှ်ဟွံကဝိုၚ်လ္ပဂြဴဂၠိုၚ် အန္တရာယ်ဗိုၚ်ကၠုၚ်ရောၚ်။
၂. ၅၈။ အခေါၚ်တုပ်သၟဟ်ဂှ် ဖန်ဗဒှ်ကဵု ပရေၚ်ညဳသာ ပရေၚ်ညဳသာဂှ် ဖန်ဗဒှ်ကဵုပရေၚ်ၜိုဟ်လလံ ပရေၚ်ၜိုဟ်လလံဂှ်ဖန်ဗဒှ်ကဵု ပရေၚ်ဖေါအ်ဗြေဝ် တောတက်ရောၚ်။
၂. ၅၉။ ဂကူဇကု အဝဵုပရေၚ်ဍုၚ်ကွာန်ဟွံမွဲ ကၠောန်ပရေၚ်ပိုန်ဒြပ်မ္ဂး တုပ်ညံၚ်ကၠောန်ဗ္စညးတၞဟ်ရ၊ ဂကူနွံကဵုအဝဵုတအ် ဗက်အကံက် ပၠံၚ်ၜးရေက်ကးစနာနာသာ် ဒးဒုၚ်ရောၚ်။ ခေတ်မန်ပိုဲ ကူသာန်သွံရာန်အာမံၚ် ပဳနာန်တေံဂှ် ကလေၚ်ချပ်ရံၚ်ညိ။ ပ္ဍဲခေတ်ဏံ ဒးဒုၚ်သီကၠအ်ဂှ် ဟိုတ်ဏအ်ကီုရ။
၂. ၆၀။ အဝဵုပရေၚ်ဍုၚ်ကွာန်ဂှ် စဵုဒၞာကဵုပရေၚ်ပိုန်ဒြပ် ပရေၚ်အရေဝ်၊ လိက်ပတ်ယေန်သၞာၚ် အခေါၚ်ဂကူနာနာ ကေုာံ အခေါၚ်အရာမၞိဟ်နာနာသာ်ရ။ အဝဵုပရေၚ်ဍုၚ်ကွာန်သ္ဂောံခိုၚ်ဂှ် ဒးစဵုဗိုၚ်လဝ် ကုဇြဟတ်ဒပ်ပၞာန် ဇြဟတ်ညးဍုၚ်ကွာန်ရောၚ်။
၂. ၆၁။ ဒးစိုတ်စကာသၞောတ် ဒဳမဝ်ကရေဇြဳမ္ဂး ဍုၚ်မန်ဇၞော်သၠဲဂှ် လ္ပလောဘ၊ အပ္ဍဲဍုၚ်မန် လၟိဟ်ဂကူမန်ကဝက်ပြၚ် ၚ် ညံၚ်ဂွံနွံဂှ်ချပ်၊ သာ်ဂှ်ဟေၚ် အပ္ဍဲကၠတ်ထဝ် ( ပါလဳမာန် ) ညးစၞးဂကူမန်နွံဂၠိုၚ်မာန်တုဲ အတိုၚ်ပၟိက်စိုတ်ဂကူမန် ကၠောန်ဂွံဒှ်ဖဵုဂုဏ်မာန်ရောၚ်။
၂. ၆၂။ ဍုၚ်မန်ဂှ် ရာဒနာကေတ် အာတ်ကေတ် ရာန်ကေတ် ဟွံဂွံဂှ် ကၠးမံၚ်ရ၊ နွံပၟိက်ကဵုဍုၚ်မန်ဍာံဍာံမ္ဂး နဲဂွံမာန်ဂှ် ချပ်တုဲ ကၠောန်ကေတ်ဟေၚ်ဂွံမာန်ရောၚ်။ ဇကုလေဝ် ဒးကၠောန် သီုဒးပကောံဝဳၜံၚ်မၞိဟ်ကၠောန် ပရေၚ်ဂကူ ဂၠိုၚ်ၚ်ရောၚ်။
၂. ၆၃။ သၞောတ်ပရေံပရေံတအ် ပလီုပလာ်ဏာကၟိန်ဍုၚ်နရုပ် ဆဵုညာတ်ကေတ်မာန်တအ်ဂှ် ညာတ်လောဲ ပလေဝ်လောဲမံၚ်ဏီ ပလီုဏာစိုတ်ဓါတ်ဒဂေတ်ပဋိပတ်သၞာဲဒဴ ညးဍုၚ်ကွာန်တအ်ဂှ် ပလေဝ်ဝါတ် ကွေံကွေံရောၚ်။
၂. ၆၄။ သွက်ပုၚ်မွဲဗုၚ် လ္ပဒုၚ်သ္ပဍိက်ပၠက်ညးကလက်ဂကူဇကုညိ၊ ဒုၚ်သ္ပဍိက်ညးမ္ဂး ညးဇြဟတ်ဇၞော်သၠုၚ် ဂကူဇကုဒးဒုၚ် ဍုၚ်ဇကုဒးကၠေံ ဘဝဂကူဇကု ဒးပရေအ်အာရောၚ်။